A che servono , oramaje , sti pparole ,
a che serve suffrì inutilmente...
quanno 'o ssaccio sicuro , m''o ssento
ca tu si' felice accussì .

Ma che vuò . Forse 'nfunn'a stu core
quacche cosa d'allora è rimasto :
fors'ammore e l'arraggia , nun saccio ,
saccio sulo ca moro pe' tte !

E penzanno ca 'o viento te vasa ,
e ca 'o sole 'a matina te sceta ,
ca tu parle 'e bbene cu' n'ato ,
i' me sento sta vita 'e fernì .

Si m'addormo te veco 'int''o suonno ;
si me sceto te chiammo pe' nomme :
si cammino te veco fra 'a ggente...
che turmiento è stu bbene Marì .

E m'acquieto sultanto si penzo
ca sta vita è na cosa 'e passaggio ;
ca nu iuorno p''e strade d''o cielo
forse ,ammore , i' te pozzo 'ncuntrà .

Luciano Somma