E' notte,'sta Napule sonna
criature cu''e ffacce cchiu' allere
cantannele na nonna-nonna
'e tutta na storia d'ajere.

Fa parte 'e ll'Europa e 'o duimila
sta spaparanzanno già 'a porta
vurria se spezzassero 'e file
'e 'sta guarrattella d''a sciorta.

Città ca nun è sulamente
nu pizzo 'e mariuole e pputtane
che campa na vita pezzente
stentanne pe' nu muorzo 'e pane.

E' munno ca chino 'e speranza
mo stà fravecanno 'o dimane
pecchè l'universo 'mparanza
l'aiuta cu''a forza d''e mmane

ch'asciuttano 'o chianto 'e criature
crisciute 'int''a vocca d''o vico
scetannese senza 'e ppaure
c''o sole,nu sole ch'è amico.

N'amico brillante e lucente
ch'appiccia 'sti vicule,abbaglia,
sarrà chesta 'a carta vincente
oppure sarrà fuoco 'e paglia?

Na paglia ch'abbrucia ma sceta
'sta grande città,na culonna,
ch'è fatta d'acciaro no 'e preta
ca è vita,ca è luce,nun sonna!


Luciano Somma