Cu''e schiocche 'e russo 'nfaccia na " pacchiana "
m'ha tuzzuliato 'a porta stammatina
'int''o panaro : ove e pullo paisane
e 'ncuollo nu prufumo 'e giesummine .

Teneva 'o pietto gruosso 'e na nutriccia ,
tunno , aggraziato , genuino e bello ,
m'ha dato 'o riesto (io nun tenevo spiccio )
piglianno 'e sorde 'a sotto a na mammella .

Comm'era fresca , tosta e assaje carnale
cu''o pietto miez' 'a dinto e miez' 'a fore
" Gnornò " , m'ha ditto me facite male...
che vaje dicenno core 'e chistu core .

Femmene 'e classe , tutte 'ntulettate ,
cu''a faccia mascherata 'e fetenzie
cu' creme , ciprie e sempe assaje 'nzevate
che so' vedenno a tte pacchiana mia .


E simme state 'nzieme quase n'ora ,
muglierema era scesa pe' fà 'a spesa ,
e che priezza è stato a fà l'ammore...
pò s'è vestuta pe' turnà 'o paese .

Ce simme salutate e pe' tramente
essa scenneva 'e scale ha avuto 'e faccia
muglierema che s''a teneva mente
mentre saglieva cu''a criatura 'mbraccia .

Che d'è ha ditto , trasenno dint''a casa ,
smiccianno ll'ove e 'o pullo 'int''a cucina ,
'sta puzza ca me trase dint''o naso ?
Nun ha sentuto 'addore 'e giesummine...


Luciano SOMMA