...E campe 'int'a nu munno artificiale
trasenno 'int'a na longa galleria
assapuranno sulamente 'o mmale ,
che spiere maje 'e truvà pe' chesta via ?

Fore a natura canta e nun 'o ssaje
stiso 'ncopp'a stu lietto a diciott'anne
te pare doce chello ca te faje
e ll'ore toie cchiù belle se ne vanno .

Sunnà nu vuolo d'aquila è pazzia
quanno l'urdema luce s'è smurzata
e 'o velo niro d''a malincunia
appanna tutt''e suonne d''a nuttata .

'O sole spuntarrà pure dimane
ma 'o vedarraje d''a senga d''a fenesta
cu' na serenga a perdere 'int''e mmane
dint''o cerviello 'a solita tempesta .

Ma chesta nun è vita è nu peccato
è nu cammino senza cchiù speranza
sti diciott'anne tuoje ca sò sprecate
dint'a sti quatto mura 'e chesta stanza .

T''o dico pecchè t'aggio miso a 'o munno
e certamente no pe' chesta sciorta
'mocca a na vocca 'e lupo 'int''o sprufunno
addò ogne cosa 'nganna te va storta .

T'aggio tuccato 'a fronte , comme cuoce ,
a 'a voce toja è sultanto nu lamiento
cu''e ddete t'accarezzo doce , doce ,
e 'o core 'mpietto sta sbattenno a viento .

Iesce fore a stu munno artificiale
nun te n'accuorge ma t'accorcia 'a vita
fammille pe' Natale stu riàlo
fallo asciuttà stu sango d''a ferita .

Guarda ce conto giuralo pe' Dio
ca chisto è l'urdemo ago dint''e vvene
fa cunto ca tu fusse 'o pate mio
e io fosse figlio a tte 'mpazzuto 'e bbene .


Luciano Somma