"Miercurì", me diciste na sera,
"miercurì viene cca' che t'aspetto".
Ma po' invece, chisà, pe' dispietto,
nun veniste, e d'allora maje cchiù...

Miercurì... so' passate sei anne,
e oramaje tu si' mamma 'e tre figlie:
stammo 'e casa 'int''o stesso quartiere,
e i' te veco ogne juorno passa'.

Chistu core, 'o ritratto 'e ll'ammore,
nun capisce ca tu si' spusata,
nun 'o ssape ca tu mo si e' n'ato,
e se mette ogne juorno a canta'.

I' te guardo, e te leggio 'int''a ll'uocchie
- 'nnammurate sincere 'e na vota -
'a tristezza 'e nu bbene perduto,
tutt''ammore ca nun me puo' da'.

Miercurì... si ce fusse venuta,
chill'ammore nun sarria falluto
i' nun stesse abbracciato a 'o passato;
tu nun stisse murennno, campanno cu' n'ato!...


Luciano SOMMA