Io , chesta sera
nun sento canzone
nun leggo 'o giurnale
nun faccio rummore ;
io , chesta sera
nun dico preghiere
guardanno 'o bicchiere
ch'è chino d'ajere...
io , chesta sera
me conto 'a buscia
ca tu si' d''a mia ,
che malincunia !
Io , chesta sera ,
nun stongo distratto
pirciò vengo a patto
finanche cu' Dio !
E sento na voce
ca vene 'a luntano
e sento sta mano
ch'astregne na mano
..e veco na faccia
cchiù doce e cchiù nova
scurdanneme 'a Croce
ch'ancora me 'nchiova...
E torna 'o penziero
'e n'attimo 'e tiempo
campato sincero
gustato cuntento .
Io , chesta sera
nun scrivo canzone ,
nun guardo 'o giurnale ,
nun faccio l'ammore .
Io , chesta sera
m'abbraccio 'e ricorde
me vaso 'o cuscino
t'astregno vicino
cumpagna d''a vita
carezza 'e stu core :
Speranza , sincera
pe' mme , chesta sera...


Luciano Somma