I

'Ncopp''all'onne 'e ricorde luntane
nuje turnammo a cantà na canzone
finalmente nun è sulo 'o ppane
ch'assapora sta pupulazione
comm'è longa sta marcia d''o bbene
che facimme p''a via d''o dimane
fila grossa 'e meliune 'e perzone
fiere d'essere napulitane.

Voce 'e popolo
voce 'e dio
canta Napule:
'O sole mio !
tarantelle e triccaballacco
tammorrelle e scetavajasse
finalmente è arrivato 'o tabbacco
'mbruscennammece dint''e nanasse
stu miraculo
po' fernì
forza Napule
nun t'abbelì .

II

St'eco 'e voce se spanne p''o munno
e pe' ll'aria cchiù forte se sente
'a 'int'all'anema esce d''o funno
e nisciuno pò dicere niente .
Che bellezza ca tene sta terra
che ricchezza d''o cielo è chiuvuta
miez''a folla ce sta 'o serra-serra
tutt''a ggente me pare 'mpazzuta .

III

Parte e vola 'a palomma d''a pace
quanta smania ca tene 'int''e scelle
leggia , leggia comme a na vammace
va e s'ammesca cu''a luna e cu''e stelle
ha purtato 'mmasciata e na santa
l'accarezza sentenne 'e pparole
e pò guarda cca bbascio chi canta
pur'a notte 'a canzone d''o sole .

Luciano Somma