Chin''e perucchie , brutta e senza diente
pareva 'a statua d''a disperazione
cu''e ccarte mmane e 'a sicarretta 'mmocca
m''a vedette , antrasatta , accumparì .

" I' faccio 'a cinquantanne stu mestiere
giovane mio , nun aggio maje sbagliato ,
aggio sempe , sicuro , andivinato ,
esattamente 'o futuro e 'o ppassato ."

S'appresentaje accussì e 'a vocca aperta
attentamente m''a stette a sentì
ma cchiù 'e na fessaria l'ascette 'a vocca
e i' facette finta 'e nun capì .

Quanno però fernette 'a " prestazione " ,
cu' nu surriso che faceva schifo ,
me dicette : " Guagliò , mo ch'he saputo
'a cumpetenza tu me l'he a pavà .

I' rispunnete cu' na faccia tosta :
" Madà , nun tenco sorde , che vuò fà ? "
" Ma comme forze tu starraje pazzianno
c''o cacchio si nun pave tu jesce a ccà !"

" Nun t''a piglià so' incerte d''o mestiere "
le dicette fujenno e po' : " Cestunia !
che fattuchiara si' ca nun sapive
che dint''a sacca nun tenco na lira ? "

Luciano Somma


Parigi , 1958