Senza penzarce
manco nu minuto ,
senza avutarme maje
na vota areto ,
miez ' ' o lamiento
'e prete 'e mura antiche ,
vico addò songo nato
io te lassaje .
Purtanneme cu' mme
vintitreanne 'e tanfa
d''e quartiere
comma a' n'auciello
vola d''a cajola
'int'a na scena
'e chillu mare 'e guaje
io te lassaje .
Si aggio fatto buono
o malamente
chesto chi 'o po' sapè ?
Sultanto Dio
ca certamente mo
me tene mente
vedenno che na parte
'e core mio
sta ancora là
addò aggio visto 'a luce
addò ce sta chi resta
addò ce sta chi lotta
chi tene ancora 'a freva
'e na passione ca se chiamma
fede
cuvanno ancora 'mpietto na speranza
ma io nun ce credette
e te lassaje .

Luciano Somma