Comme vurria tenè nu pate viecchio
che s'allisciasse spisso 'a barba janca
mirannese penzanno dint''o specchio
cu' n'ombra 'e luce 'int''a dduje uocchie stanche ...

Murette ch'ero ancora piccerillo
'e isso m'arricordo poco o niente
si avesse avuto pacchere o nu strillo
mo nun me sentarria accussì pezzente .

E se trascina , e songo già tant'anne ,
stu desiderio d''o sentì vicino
'nzieme 'e penziere mieje ca se ne vanno
cercanno , cuntrariate , 'a nu destino

nu pate viecchio cu' na barba janca
cu''e piccerille a Vierno , attuorno a rrota ,
cuntà felice ma cu''a voce stanca
dint''o silenzio : < Ce steve na vota...>


Luciano Somma

da DIMANE
Ed.degli Artisti
Napoli - 1977