Tu 'ncopp''o palcuscenico
si stato n'attrazione ,
'o rre d''o munno comico
pe' tre generazione .
Verace figlio 'e Napule ,
n'he dato buonumore ,
sapive fà miracule
cu' l'arte toia d'attore .
Madò , che Ddio 'e cervella
tenive comme autore
pe' scrivere 'A LIVELLA
e 'O FINE DICITORE .
Pe' fà na MALAFEMMENA
ch'è nu capolavoro ,
canzone chine 'e sèmmena
ch'ogge se canta ancora .
A sta città che campa
'a sempe 'int''o turmiento
tu c'he lassato 'a lampa ,
nu sciummo 'e sentimento .
N'eredità 'e surriso
nu testamiento 'e core
na luce 'e pizzo a rrisa
l'oro 'e nu 'nduratore .
E pe ringraziamento
t'avimmo dedicato
Totò , nu monumento
tutto pe tte , allustrato !
Napule è na famiglia
aunita 'int''o calore
e tu ca lle si' figlio
nun può murì , nun muore !

Luciano Somma

da MUSICA NOVA
Ed.Lo Stiletto
1993