'O PUSTIGGIATORE

Haggio passato 'a vita 'int''o triato,
n'haggio 'ntiso 'e canta' 'e voce belle!
E pozzo giudica' sentenno a n'ato
si e' degno 'e fa''a pusteggia sotto 'e stelle.

Pe ffa' 'o mestiere nce vonno ddoie cose:
'a simpatia e nu felillo 'e voce...
ma pe' fa' 'ntenneri' 'na coppia 'e spose
he a tene' ncore na passiona doce.

Che bella cosa e' notte dint''e viche
cu ddoie chitarre e quattro manduline
senti' 'e mutive de canzone antiche:
me pare 'e sfuglia' mille cartuline.

Ogne citta' e' terra 'e tradizione
e a napule,ch'e' 'a patria d''e canzone,
s'hadda canta' cu core e cu passione
pure si cante sotto a nu balcone.

Ogne napulitano se l'avanta
pecche' e' sole,e' lluce,e' tutto ammore...
chesta canzone tutt''o munno 'ncanta
specie si 'a canta nu pustiggiatore.